Lóð nýja háskólasjúkrahússins er mjög miðsvæðis í Reykjavík og skal skipulag þess taka mið af því að það falli sem best að aðliggjandi byggð og því byggðamynstri sem er í borginni, veðurfari og öðrum þáttum í umhverfi svæðisins sem og innan þess.
Svæðið liggur við eina helstu umferðaræð borgarinnar til austurs og vesturs, sem er Hringbraut – Miklabraut. Sunnan við svæðið er Reykjavíkurflugvöllur sem sinnir innanlandsflugi til og frá Reykjavík. Sökum flugvallarins þarf að taka sérstakt tillit til hæðatakmarkana bygginga. Norðurhluti skipulagssvæðisins liggur að rólegu og grónu íbúðarhverfi sem byggt var upp á árunum 1935 – 1955.
Háskóli Íslands er staðsettur suðvestur af skipulagssvæðinu og við Eggertsgötu /Njarðargötu hefur nú verið skipulagt þekkingarþorp sem mun í framtíðinni byggjast upp sem miðstöð rannsókna og þróunarvinnu atvinnulífsins með tengingum við rannsóknargreinar í HÍ.
Lóðin afmarkast í grófum dráttum af eftirfarandi götum Snorrabraut, Eiríksgötu, Barónsstíg, Hringbraut að norðanverðu og legu nýrrar Hringbrautar að sunnanverðu.
Mörk skipulagssvæðis – lóðamörk eru skilgreind á grunnmynd og er svæðið samtals 174.400 m² að flatarmáli. Ekki er gert ráð fyrir að unnið verði með svæði utan skilgreindra lóðamarka.
 |
|||
|
Svæði |
Nýtingarhlutfall |
Stærð lóðar ha |
Heimilað byggingarmagn m² |
|
A og B |
1,00 |
14,83 |
148.300 |
|
U |
1,01 |
27,72 |
28.000 |
|
Samtals spítali |
176.300 |
||
|
Miðbæjarstarfsemi á U reit |
7.000 |
||
|
Samtals skipulagssvæði |
183.300 |
||
Skipulagssvæði A, B og U
Leyfilegt byggingarmagn á svæðinu er 176.300 m² auk 7.000 m² fyrir verslunar- og þjónustustarfsemi. Bílastæðahús eru ekki talin með í þessum tölum enda er gert ráð fyrir að þeim verði komið fyrir að stórum hluta neðanjarðar og að með landmótun og skipulagi verði hægt að draga úr áhrifum þeirra á umhverfi svæðisins.
Skipulag á svæðinu skal taka mið af því að heildstæð og hagkvæm lausn fáist til lengri tíma litið og að hægt sé að byggja svæðið upp í áföngum. Þá þarf að taka tillit til þess að núverandi starfsemi á lóðinni þarf að vera í fullum rekstri þar til hægt er að flytja hana yfir í nýjar byggingar. Starfsemi Landspítalans og kennslu- og rannsóknardeilda HÍ í heilbrigðisgreinum er dreifð um Reykjavík og er gert ráð að hún flytji á svæðið eftir því sem það byggist upp.
Byggingamagn
Núverandi byggingarmagn Landspítala - háskólasjúkrahúss á lóðinni er um 60.000 m² og er að stórum hluta frá árunum 1950 – 1970. Í fylgiskjali er að finna yfirlit yfir þessar byggingar og teikningar. Á grundvelli þessarar forsagnar, hagkvæmni í rekstri spítalans, innri tenginga starfseininga og þjónustu við sjúklinga skulu hönnuðir leggja mat á hverjar þessara bygginga munu hverfa. Ein bygging er friðuð á svæðinu, Gamli kennaraskólinn á horni Barónsstígs og Hringbrautar. Þá hefur verkkaupi ákveðið að gamli spítalinn frá árinu 1930 skuli standa og að tryggð verði góð ásýnd að framhlið hans (suðurhlið, þ.e. hús 1 álma A-B). Nýjasta byggingin á svæðinu er Barnaspítali (6800 m²), en hann var byggður á árunum 2000 – 2003. Aðrar byggingar í tímaröð eru 1. áfangi K-byggingar, U-bygging og Læknagarður frá um 1990 og geðdeild frá um 1980.
Umferð og bílastæði
Umferð kringum lóðina er mikil, sér í lagi við nýju Hringbrautina. Skipulag umferðar og bílastæða innan svæðisins skal miða við að þar verði hæg en greið umferð. Mjög hátt hlutfall þeirra sem sækja inn á lóðina koma á einkabílum og skal hönnun miða við að hægt sé að anna þeirri umferð inn á lóðina.
Góð aðkoma þarf að vera fyrir neyðarbíla að bráðamóttöku, gott aðgengi að dag- og göngudeildum fyrir gesti og sjúklinga, umferð starfsmanna við vaktaskipti og aðkoma stórra þjónustubíla. Við skipulag skal tekið mið af íslenskum veðuraðstæðum og að þjónusta við gesti og sjúklinga verði sem best við helstu innganga að spítalanum. Samkvæmt samningi við Reykjavíkurborg er kvöð um tveggja akreina götu í gegnum svæðið frá austri til vesturs fyrir almenningsvagna og almenna umferð að nálægum íbúðargötum. Staðsetning gömlu Hringbrautar er óbundin, en tengingar skulu halda sér.
Skipuleggja skal göngustígakerfi innan lóðar og tengja við stígakerfi Reykjavíkur þannig að þeir myndi eina heild. Sérstaklega er bent á góða tengingu við göngubrýr yfir nýja Hringbraut til vesturs yfir á Háskólasvæðið og til suðurs þar sem ráðgert er að hraðleiðir almenningsvagna muni hafa viðkomu.
Gert er ráð fyrir þyrlupalli á svæðinu í góðum tengslum við bráðamóttöku. Miðað er við lendingarpall fyrir sambærilegar þyrlur og Landhelgisgæslan er með í dag.