Gengið hefur verið frá samningi um frumhönnun og gerð alútboðsgagna milli SPITAL hópsins, sem bar sigur úr bítum í sumar í hönnunarsamkeppni um nýjan Landspítala, og hlutafélagsins Nýr Landspítali ohf., sem stofnað var í vor til að standa að undirbúningi og útboði á byggingu nýs háskólasjúkrahúss við Hringbraut.

Hönnunarteymið SPITAL varð hlutskarpast í samkeppni um áfangaskipt heildarskipulag fyrir nýtt háskólasjúkrahús við Hringbraut og frumhönnun 1. áfanga nýja spítalans og tengdrar háskólastarfsemi. Niðurstaða dómnefndar var kynnt við hátíðlega athöfn á Háskólatorgi í dag. Í SPITAL teyminu eru ASK arkitektar, Bjarni Snæbjörnsson arkitekt, Kanon arkitektar, Medplan, Teiknistofan Tröð, Landark, Efla verkfræðistofa, Lagnatækni og Norconsult.

Niðurstaða hönnunarsamkeppni um byggingu nýs Landspítala og húsnæðis fyrir heilbrigðisvísindasvið Háskóla Íslands verður kynnt á morgun, föstudaginn 9. júlí 2010,  kl. 11:00 á Háskólatorgi.

Opinbert hlutafélag sem standa mun að undirbúningi og útboði á byggingu nýs Landspítala við Hringbraut tekur til starfa 1. júlí næstkomandi í kjölfar þess að Alþingi samþykkti fyrir helgi frumvarp fjármálaráðherra um stofnun félagsins. Markmiðið er síðan að ríkið taki bygginguna á langtímaleigu þegar byggingaverktaki hefur lokið umsömdu verki.

Rúmlega vika er nú þar til hönnunarteymin fimm skila inn tillögum að nýjum Landspítala því keppnistillögurnar eiga að liggja fyrir fimmtudaginn 10. júní 2010 og niðurstöður samkeppninnar verða kynntar föstudaginn 9. júlí.

Fulltrúar verkefnastjórnar um byggingu nýs Landspítala, þau Gunnar Svavarsson formaður, Jóhannes M. Gunnarsson og Gyða Baldursdóttir, hafa undanfarið heimsótt heilbrigðisstofnanir víða um land til að kynna nýjan Landspítala, þjóðarsjúkrahús Íslendinga.